Memleket basshysy biz ómir súrip jatqan jańa jahandyq jaǵdaıda kútip otyrmaı, bolashaqqa senimdi qadam basqan jáne qaterlerge qarsy áreket etken halyqtar ǵana jeńimpaz atanatynyn osynyń aldynda da aıtqan bolatyn.
Taldaýlar boıynsha, aldaǵy on jyl ınnovasııalar jappaı engiziletin jáne joǵary tehnologııalar men qyzmet kórsetýlerdiń jahandyq naryqtaǵy básekelestigi kúsheıetin ýaqyt bolady. Joǵary tehnologııalar men ınnovasııalar ekonomıkalyq órkendeýdiń draıveri bolyp tabylady. 2050 jylǵa deıin álemdik ekonomıkanyń sıpaty eleýli túrde ózgeretini baıqalýda, ol jańa deńgeıdegi tehnologııalarǵa jappaı kóshýge áser etedi.
Damýdaǵy jahandyq kórinisterdi eskere otyryp, Memleket basshysy 10 negizgi mindetti aıqyndady jáne ony oryndaýǵa jumylýǵa shaqyryp otyr. Basty mindetterdiń qatarynda «sybaılas jemqorlyqpen kúres jáne zańnyń ústemdigin ornatý» mindeti burynǵysha qala beredi.
El Prezıdenti N. Nazarbaevtyń sybaılas jemqorlyqqa qarsy pármendi jumystardy jalǵastyrýǵa bergen tapsyrmasy sybaılas jemqorlyqty anyqtaý jáne onyń sebepteri men alǵysharttaryn túbirinen joıý jónindegi jumystardy kúsheıtýge mindettep otyr.
Memlekettik organdardyń turǵyndarmen jáne bıznespen ózara is-qımyl úderisterin sandyq negizge kóshirý jóninde de tapsyrma berildi. Bul memlekettik organdar jumysynyń móldirligin kórsetip, jurtshylyqqa qyzmet kórsetý úderisterin jeńildetedi.
Sondaı-aq azamattardyń konstıtýsııalyq quqyqtaryna kepildikti nyǵaıtý, zań ústemdigin qamtamasyz etý, quqyq qorǵaý qyzmetin izgilendirý jónindegi jumystar jalǵasatyn bolady.
Parlament Senatynyń depýtattary Prezıdent Joldaýyn iske asyrýdy zańnamalyq turǵyda qamtamasyz etý jumystaryn júzege asyratyn bolady.
Vladımır Volkov,
Parlament Senatynyń depýtaty
